सामूहिक लगानी कोषलाई दीर्घकालीन पूँजी परिचालन गर्ने माध्यमको रुपमा विकास गर्ने उद्देश्य सहित तयार गरिएको सामूहिक लगानी कोष नीति, २०८३ को मस्यौदामा राय सुझाव माग गरिएको सम्बन्धमा।

नेपाल सरकार अर्थ मन्त्रालयबाट मिति २०८३।०५।२९ मा जारी गरिएको पुँजी बजार सुदृढीकरण तथा पुनरूत्थान कार्ययोजना, २०८३ को बुदा नं. २ मा ऋणपत्र बजार, मुद्रा बजार, इटिएफ जस्ता उपकरण विकास गर्न म्युचुअल फण्डलाई व्यावसायिक, विविधीकृत, पारदर्शी, जोखिम सचेत, प्रविधिमैत्री एवं दीर्घकालीन लगानीको आधारस्तम्भ बनाउन बोर्डले यस सम्बन्धी नीति तत्काल सार्वजनिक गरी २०८३ मंसिर मसान्तभित्र निर्देशिका एवं अन्य आवश्यक पूर्वाधारको व्यवस्था गर्ने कार्ययोजना बमोजिम बोर्डबाट सामूहिक लगानी कोष नीति, २०८३ को मस्यौदा तयार गरी सार्वजनिक परामर्शका माध्यमबाट सम्बन्धित सरोकारवालाको राय, सुझाव तथा सुधारका क्षेत्र पहिचान गर्न सार्वजनिक गरिएको छ।

प्रस्तावित नीति मार्फत सामूहिक लगानी कोषको स्थापना, सञ्चालन, नियमन तथा सुपरिवेक्षण कार्यलाई एकीकृत रूपमा सम्बोधन गर्दै सामूहिक लगानी कोष उद्योगलाई आधुनिक, पारदर्शी, सुरक्षित र प्रतिस्पर्धी बनाउँदै दीर्घकालीन पूँजी परिचालन तथा लगानीकर्ता संरक्षण सुदृढ गर्नुका साथै संस्थागत लगानीकर्ताको विकास गर्ने दिशामा नीति केन्द्रित रहेको छ। प्रस्तावित सामूहिक लगानी कोष नीति, २०८३ ले खुलामुखी (Open-ended) योजनालाई प्राथमिकता दिने; Exchange Traded Funds (ETFs), Real Investment Trusts (REITs), पूर्वाधार तथा हरित कोष लगायतका नयाँ लगानी उपकरणको विकास गर्ने, लगानीको विविधीकरण गर्ने, सम्पत्ति मूल्यको पारदर्शी गणना विधि अपनाउने, तरलता तथा पुनःखरिदको प्रभावकारी व्यवस्थापनमा जोड दिने तथा लगानीकर्तालाई समयमै सूचना उपलब्ध गराउने प्रमुख नीतिगत व्यवस्था गरेको छ।

साथै, नीतिमा लगानीकर्ताको हित संरक्षणका लागि पारदर्शिता, गुनासो व्यवस्थापन, स्वार्थको द्वन्द्व नियन्त्रण, प्रस्तिपर्धी शुल्क संरचना, जोखिम व्यवस्थापन र संस्थागत सुशासनमा जोड दिइएको छ। डिजिटल सेवा तथा साइबर सुरक्षालाई समेत नियामकीय व्यवस्थाको महत्वपूर्ण पक्ष बनाइएको छ। प्रस्तावित नीतिले सामूहिक लगानी कोष योजना व्यवस्थापकको विशेषज्ञ (विशिष्ट) क्षमतामा निर्भर हुने विषयलाई आत्मसाथ गर्दै योजना व्यवस्थापकको क्षमता, जनशक्ति, सूचना प्रविधि पूर्वाधार तथा समग्र व्यवस्थापन क्षमतामा सुदृढिकरण गर्दै व्यवस्थापन शुल्कमा कार्य सम्पादन प्रतिविम्बित हुने विषयलाई समेत प्राथमिकता दिएको छ।

प्रस्तावित नीतिको चरणबद्ध रूपमा कार्यान्वयन गर्दै जाँदा साना बचतकर्ताहरूको दीर्घकालीन बचतलाई पूँजी बजारमा परिचालन, विविध लगानी अवसरको विस्तार र बजारको स्थायित्वमा योगदान पुग्ने बोर्डले अपेक्षा गरेको छ।

सामूहिक लगानी कोष नीति, २०८३ (मस्यौदा) तथा यसको सारांश सहित लगानीकर्ता तथा सरोकारवालापक्षले सुझाव दिन सकिने विषयहरू समेटिएको विवरण तल दिइएको लिङ्कमा क्लिक गरी प्राप्त गर्न सकिने छ। प्रस्तावित नीतिमा मिति २०८३।०७।१५ भित्र सुझाव दिनुहुन सबैलाई अनुरोध गर्दछौं।

Link सामूहिक लगानी कोष नीति, २०८३ (मस्यौदा)

प्रस्तावित सामूहिक लगानी कोष नीति, २०८३ परामर्शका लागि सारांशपत्र तथा सुझाव/प्रतिक्रिया मागसम्बन्धी प्रश्नावली