धितोपत्र बजारमा बेञ्चमार्क सूचकाङ्कको पुनर्संरचना सम्बन्धी कार्यपत्र, २०८३ परामर्शको लागि सार्बजनिक गरिएको सम्बन्धमा।

नेपाल सरकार, अर्थ मन्त्रालयबाट मिति २०८३।०५।२९ मा जारी गरिएको पुँजी बजार सुदृढीकरण तथा पुनरूत्थान कार्ययोजना, २०८३ को बुदा नं. ६ मा “नेप्से सूचकाङ्कलाई All Equity Index को रूपमा कायम राखी कारोवारयोग्य शेयर, बजार पुँजीकरण, कम्पनीको वित्तीय अवस्था, कारोबारको तरलता, संस्थागत सुशासन, सूचना प्रवाहको स्थिति जस्ता सूचकको आधारमा धितोपत्र बजारको नयाँ आधारभूत सूचकांक (Benchmark Index) २०८३ मंसिर मसान्तभित्र प्रयोगमा ल्याउने ” कार्ययोजनामा उल्लेख भए बमोजिम बोर्डबाट धितोपत्र बजारमा बेञ्चमार्क सूचकाङ्कको पुनर्संरचना सम्बन्धी कार्यपत्र, २०८३ तयार गरी परामर्शका लागि सार्वजनिक गरिएको छ। 

हाल प्रयोगमा रहेको नेप्से परिसूचक (NEPSE Index) ले दैनिक कारोवार नहुने, लक-इन भएका संस्थापक शेयरहरुको समेत बजार पुँजीकरणलाई आधार मानी सूचकांक गणना गर्ने गरिएको छ। जसको कारण सरकारी स्वामित्वमा भएको तथा लक-इन शेयरहरू कुल बजार पुँजीकरणमा जोडिए तापनि दैनिक कारोबारमा उपलब्ध नहुने हुँदा यथार्थपरक बजार सूचकांक मापन नहुने हुँदा यसले बजारको यथार्थ चित्रण नभएको भन्ने जनसरोकारको विषय सम्बोधन गर्नु पर्ने भएकोछ। 

यस समस्याको समाधानका लागि प्रस्तावित संरचना अन्तर्गत हाल कायम रहेको नेप्से सूचकाङ्कलाई यथावत राखी यसलाई समग्र शेयरको मूल्य मापन गर्ने बृहत् सूचक (NEPSE All Equity Index) को रूपमा पुनर्संरचना गरिनेछ। कारोवारयोग्य फ्री-फ्लोट शेयरको बजार पुँजीकरणमा आधारित (NEPSE Benchmark Index) को विकास गरिनेछ। यस नयाँ बेञ्चमार्कको कार्यान्वयनका लागि संस्थापक, सरकारी र लक-इनमा रहेको शेयरहरूलाई छुट्याएर कारोबारयोग्य हिस्साका आधारमा निश्चित फ्री-फ्लोट फ्याक्टर लागू गरिनेछ।  

कारोवारयोग्य फ्री-फ्लोट शेयरको बजार पुँजीकरणमा आधारित नयाँ Benchmark Index को विकास पश्‍चात् नेप्से सूचकांक गणना विधि यथार्थपरक हुनुका साथै इन्डेक्स फन्ड, ईटीएफ र डेरिभेटिभ्स् जस्ता आधुनिक वित्तीय उपकरणहरूको विकासमा सहयोग हुने अपेक्षा गरिएको छ। 

धितोपत्र बजारमा बेञ्चमार्क सूचकाङ्कको पुनर्संरचना सम्बन्धी कार्यपत्र, २०८३ तल दिइएको लिङ्कमा क्लिक गरी प्राप्त गर्न सकिने छ। प्रस्तावित कार्यपत्र मिति २०८३।०७।१५ भित्र सुझाव दिनुहुन सरोकावाला सबैलाई अनुरोध गर्दछौं।  

Link धितोपत्र बजारमा बेञ्चमार्क सूचकाङ्कको पुनर्संरचना सम्बन्धी कार्यपत्र, २०८३