सार्वजनिक निष्काशनको सामान्य योग्यता सम्बन्धी निर्देशिका, २०८३ को मस्यौदा उपर राय सुझावको लागि सार्वजनिक गरिएको सम्बन्धमा

सार्वजनिक निष्काशन प्रणालीलाई निष्पक्ष, व्यवस्थित तथा विश्वसनीय बनाउने गरी तयार गरिएको "सार्वजनिक निष्काशनको सामान्य योग्यता सम्बन्धी निर्देशिका, २०८३" मस्यौदा उपर राय सुझावको लागि सार्वजनिक सम्बन्धमा।

असोज १: बोर्डबाट सार्वजनिक निष्काशनका लागि योग्य, पारदर्शी तथा दिगो संगठित संस्थाहरूको छनोट सुनिश्चित गर्ने, लगानीकर्ताको हित संरक्षण गर्ने, पूँजी बजारमा निष्पक्ष, व्यवस्थित तथा विश्वसनीय सार्वजनिक निष्काशन प्रणाली विकास गर्ने, सुशासन, वित्तीय अनुशासन तथा पारदर्शितालाई प्रवर्द्धन गर्ने र विभिन्न उद्योगको प्रकृति अनुरूप जोखिममा आधारित प्रारम्भिक सार्वजनिक निष्काशन योग्यता प्रणाली विकास गर्ने तथा नेपाल सरकार, अर्थ मन्त्रालयबाट मिति २०८३।०५।२९ मा सार्वजनिक गरिएको पूँजी बजार सुदृढीकरण तथा पुनरुत्थान कार्ययोजना, २०८३(कार्ययोजना) को बुँदा नं १ मा रहेको कार्यक्रमको कार्यान्वयनको शुरूवात गर्ने क्रममा बोर्डबाट "सार्वजनिक निष्काशनको सामान्य योग्यता सम्बन्धी निर्देशिका, २०८३" को मस्यौदा सरोकारवालापक्षहरूको राय सुझावको लागि सार्वजनिक गरिएको छ ।

बोर्डबाट प्रस्तावित निर्देशिका सर्वसाधारणमा धितोपत्र निष्काशन गर्न चाहने संगठित संस्था, पब्लिक संगठित संस्थामा रूपान्तरण भई सार्वजनिक निष्काशन गर्न चाहने संगठित संस्था र प्रचलित कानून बमोजिम सार्वजनिक निष्काशन गर्न स्वीकृति प्राप्त अन्य संस्थाका लागू लागू हुने व्यवस्था गरिएको छ । साथै निर्देशिकामा प्रारम्भिक सार्वजनिक निष्काशन गर्न चाहने संगठित संस्थाका लागि आवश्यक सामान्य तथा वित्तीय योग्यता, संस्थागत सुशासनसम्बन्धी मापदण्ड, संस्थापक शेयरधनी, सञ्चालक तथा व्यवस्थापनको योग्यता, सूचना प्रवाह तथा विवरणपत्र सम्बन्धी व्यवस्था, ड्यु डिलिजेन्स तथा पेशागत उत्तरदायित्व, सार्वजनिक निष्काशनबाट प्राप्त रकमको उपयोग तथा सोको अनुगमन, निष्काशन पछिका दायित्व, अनुपालना तथा नियामकीय अनुगमनका साथै कसुर, दण्ड तथा प्रशासनिक कारबाहीसम्बन्धी व्यवस्थाहरू समेटिएका छन्।

उक्त निर्देशिकामा  प्रस्तावित व्यवस्था उपर कुनै राय, सुझाव वा प्रतिक्रिया भएमा यो सूचना प्रकाशित भएको मितिले ७ (सात) दिनभित्र बोर्डको इमेल ठेगाना support@sebon.gov.np मा उपलब्ध गराइदिनुहुन सम्बन्धित सबै सरोकारवाला पक्षहरूमा अनुरोध गरिन्छ।

अन्त्यमा, बोर्डबाट नेपाल सरकार, अर्थ मन्त्रालयबाट सार्वजनिक गरिएको कार्ययोजनामा समाविष्ट बजार विकास तथा सुधार सँग सम्बन्धित कार्यक्रमहरू तोकिएको समयमा नै कार्यान्वयनमा बोर्ड दृढसंकल्पित रहेको छ। साथै बोर्डबाट सार्वजनिक गरिएको यस निर्देशिका लागू भए सँगै सार्वजनिक निष्काशन प्रक्रिया थप व्यवस्थित, पारदर्शी, समयसापेक्ष तथा अन्तर्राष्ट्रिय अभ्यास र मापदण्डसँग अनुकूल भई योग्य कम्पनीहरूलाई पुँजी बजारमा प्रवेश गर्न प्रोत्साहित गर्दै निजी क्षेत्र तथा सर्वसाधारणबाट थप पुँजी परिचालन गर्ने वातावरण निर्माण बनी समग्र आर्थिक गतिविधि तथा आर्थिक विकासमा सकारात्मक योगदान पुग्ने बोर्डको विश्वास रहेको छ।

उक्त मस्यौदा यहाँ क्लिक गरि अध्ययन गर्न सकिन्छः Click Here