बोर्डद्वारा देशव्यापी रुपमा विभिन्न कार्यक्रमहरुको आयोजना गरी World Investor Week 2026 सम्पन्न।

धितोपत्रका नियामकहरूको अन्तराष्ट्रिय संस्था International Organization for Securities Commissions (IOSCO) को Associate Member रहेको नेपाल धितोपत्र बोर्डद्वारा IOSCO ले "Invest in Your Future. Protect It Today" भन्ने नारा सहित आव्हान गरेको यस बर्षको World Investor Week (WIW) को दशौं संस्करण यही असोज १९ देखि २५, २०८३ (5-11 October, 2026) सम्म नेपाल स्टक एक्सचेन्ज लि., सिडिएस एण्ड क्लियरिङ्ग लि, मर्चेन्ट बैंकर असोसिएसन अफ नेपाल, स्टक ब्रोकर असोसिएसन अफ नेपाल, स्टक डिलर कम्पनीहरु, क्रेडिट रेटिङ्ग कम्पनीहरु तथा देशका विभिन्न क्याम्पस तथा विद्यालयहरुको सहकार्यमा विभिन्न Educational Initiatives का साथ देशव्यापी रूपमा कार्यक्रमहरुको आयोजना गरी भव्य रुपमा सम्पन्न गरिएको छ। World Investor Week 2026 (WIW2026) को मुख्य Themes हरू Investor Resilience, Digital Deception, Scam Alert तथा Complementary Themes हरू Basics of Investing र Young Investors & Next Generation रहेका छन्। WIW2026 को Themes तथा मुख्य विषयवस्तुहरू समावेश गरी यसै अवसरमा बोर्डबाट लगानीको महत्व, नेपालमा लगानीका स्रोतहरू, धितोपत्रमा लगानी गर्दा ध्यान दिनुपर्ने कुराहरू, नवप्रवेशी लगानीकर्तालाई सुझाब, लगानीकर्ताको अधिकार, पूँजी बजारमा हुने ठगीबाट बच्ने उपाय लगायतका विषयहरू सम्मिलित एक जानकारी पुस्तिका (Leaflet) तयार गरी यस सप्ताहको अवसरमा संचालन भएका विभिन्न कार्यक्रमहरूका सहभागी तथा सर्वसाधारणहरूलाई प्रदान गरिएको थियो।

WIW2026 को पहिलो दिन (२०८३ असोज १९) नेपाल धितोपत्र बोर्डद्वारा स्टक ब्रोकर एसोसिएसन अफ नेपालको सहकार्यमा पूँजी बजार, लगानी तथा लगानीकर्ताको अधिकार र हितसम्बन्धी सचेतना अभिवृद्धि गर्ने उद्देश्य सहित WIW2026 को Themes मा केन्द्रित रही गण्डकी प्रदेशको कास्की जिल्लाको पोखरा, कोशी प्रदेशको मोरङ जिल्लाको विराटनगर तथा कर्णाली प्रदेशको सुर्खेत जिल्लाको विरेन्द्रनगरमा एकैसाथ विहान ७ बजे प्रभातफेरी कार्यक्रमहरूको आयोजना गरी औपचारिक रूपमा World Investor Week 2026 को उद्घाटन गरिएको थियो। पोखरामा आयोजित कार्यक्रममा नेपाल धितोपत्र बोर्डका अध्यक्ष डा. गोपाल प्रसाद भट्ट, विराटनगरमा बोर्डका कार्यकारी निर्देशक श्री विनयदेव आचार्य तथा सुर्खेतमा बोर्डका कार्यकारी निर्देशक श्री मुक्तिनाथ श्रेष्ठ प्रमुख अतिथिका रूपमा उपस्थित भई प्रभातफेरी कार्यक्रमको उद्घाटन गर्नुभएको थियो। नेपाल धितोपत्र बोर्डका कर्मचारी, नेपाल राष्ट्र बैंक, नेपाल बीमा प्राधिकरण, धितोपत्र दलाल व्यवसायी, मर्चेन्ट बैंकर, बैंक तथा वित्तीय संस्था र बीमा कम्पनीहरूका प्रतिनिधिहरू, विद्यार्थीहरू, लगानीकर्ताहरू लगायत पूँजी बजारसँग सम्बन्धित विभिन्न सरोकारवालाहरूको सहभागिता रहेको उक्त प्रभातफेरी कार्यक्रमहरूमा करिब १३५० जना सहभागीहरू थिए। त्यस्तै, सोही दिन बोर्डबाट WIW2026 को अवसरमा आर्थिक राष्ट्रिय दैनिक कारोबार र आर्थिक अभियानमा पूँजी बजारका लगानीकर्ता तथा युवाहरु लक्षित WIW2026 को मुख्य नारा तथा विषयबस्तु सहित धितोपत्र बजार तथा लगानी सम्बन्धी आधारभूत जानकारीहरुको मुख्य सन्देश प्रकाशन गरिएको थियो।

WIW2026 को दोस्रो दिन (२०८३ असोज १९) विहान ७ बजे बोर्डद्वारा पृथ्वीनारायण क्याम्पसको सहकार्यमा गण्डकी प्रदेशको पोखरामा “Panel Discussion on Financial Literacy” विषयक Panel Discussion कार्यक्रमको आयोजना गरिएको थियो। धितोपत्र बजार, लगानी तथा लगानीकर्ताको अधिकार र हितमा वित्तीय साक्षरताको महत्व तथा WIW2026 को Themes मा केन्द्रित उक्त कार्यक्रममा बोर्डका अध्यक्ष डा. गोपाल प्रसाद भट्ट, नेपाल राष्ट्र बैंकका कार्यकारी निर्देशक श्री राजन विक्रम थापा, पृथ्वीनारायण क्याम्पस, अर्थशास्त्र विभागका सह प्राध्यापक श्री कमल ढकाल तथा उप प्राध्यापक डा. जस बहादुर गुरूङ Panelists को रूपमा सहभागी हुनुभएको थियो भने उक्त कार्यक्रमलाई बोर्डका निर्देशक श्री अजय ढुङ्गानाले Moderate गर्नुभएको थियो। उक्त कार्यक्रममा विद्यार्थी, प्राध्यापक तथा पत्रकारहरू सहित करिब १०० जनाको सहभागिता थियो।

साथै WIW2026 को अवसरमा बोर्डबाट पृथ्वीनारायण क्याम्पसको सहकार्यमा गण्डकी प्रदेशको पोखरामा असोज २१ गते तथा वुटवल बहुमुखी क्याम्पसको सहाकार्यमा लुम्बिनी प्रदेशको वुटवलमा असोज २३ गते WIW2026 को मुख्य नारा “Invest in Your Future. Protect It Today” शिर्षकमा अन्तर विद्यालय प्रस्तुतिकरण प्रतियोगिता आयोजना गरिएको थियो। पोखराको पृथ्वीनारायण क्याम्पसमा आयोजित उक्त प्रतियोगतामा १४ वटा टिमहरूको सहभागिता रहेका थिए भने पृथ्वीनारायण क्याम्पसका शंकर दवाडी, जनप्रिय बहुमुखी क्याम्पसका सन्तोष कँडेल, रेखा गैरे र पुनम गुरूङको टिम तथा पृथ्वीनारायण क्याम्पसका अस्मिता पोख्रेल, प्रशान्त कुमार आचार्य र सम्राट गुरूङको टिमले क्रमशः प्रथम, दोस्रो तथा तेस्रो स्थान हासिल गरेका थिए। त्यस्तै वुटवलको वुटवल बहुमुखी क्याम्पसमा आयोजित उक्त प्रतियोगतामा ८ वटा टिमहरूको सहभागिता रहेका थिए भने महाकवि देवकोटा क्याम्पसका झरना राना, जोशना नेपाल र शिरिष चौदरीको टिम, भैरहवा बहुमुखी क्याम्पसकी सपना दुवे तथा क्षितिज इन्टरनेश्नल कलेजका आकार अर्याल र रिधिका शर्माको टिमले क्रमशः प्रथम, दोस्रो तथा तेस्रो स्थान हासिल गरेका थिए। साथै WIW2026 को अवसरमा बोर्डद्वारा विरजञ्ज पब्लिक क्याम्पसको सहकार्यमा मधेस प्रदेशको विरगञ्जमा असोज २२ गते “ Financial Literacy and Investment Decisions in the age of Social Media” शिर्षकमा अन्तर विद्यालय वक्तृत्वकला प्रतियोगिता आयोजना गरिएको थियो। विरजञ्ज पब्लिक क्याम्पसमा आयोजित उक्त प्रतियोगतामा १६ जना प्रतियोगीहरूको सहभागिता रहेका थियो भने विरजञ्ज पब्लिक क्याम्पसकी अनुष्का वस्नेत, विरजञ्ज पब्लिक क्याम्पसका आयुष गुप्ता तथा सिमरा कलेजकी कृती तिवारीले क्रमशः प्रथम, दोस्रो तथा तेस्रो स्थान हासिल गरेका थिए। बोर्डबाट आयोजना गरिएका उक्त प्रतियोगिताहरूमा विजयी भई प्रथम, दोस्रो तथा तेस्रो स्थान हासिल हुने टिम/व्यक्तिलाई क्रमशः रू ३०,०००/-, रू २०,०००/- तथा रू १०,०००/- रकम प्रदान गरिएको छ।

World Investor Week 2026 मै केन्द्रित रही बोर्डबाट नेपाल पत्रकार महासंघ सुदूरपश्चिम प्रदेश समितिको सहकार्यमा सुदूपश्चिम प्रदेशको कैलाली जिल्लाको धनगढीमा "सुदूपश्चिम प्रदेशका आर्थिक पत्रकारहरुसँग पूँजी बजारका विभिन्न पक्षहरू सम्बन्धी अन्तरक्रिया कार्यक्रम" शिर्षकमा एक अन्तरक्रिया कार्यक्रम आयोजना गरिएको थियो। सुदूरपश्चिम प्रदेशका आर्थिक पत्रकारितामा क्रियाशिल रहेका पत्रकारहरुलाई नेपालको पूँजी बजारका विभिन्न पक्षहरू ज्ञान प्रदान गर्ने तथा सो सम्बन्धमा निजहरूसँग अन्तरक्रिया गर्ने उद्देश्यसहित आयोजना गरिएको उक्त कार्यक्रममा बोर्डका उप कार्यकारी निर्देशक श्री नारायण प्रसाद शर्मा प्रमुख अतिथिको रूपमा रहनुभएको थियो र नेपाल स्टक एक्सचेञ्ज लि को तर्फबाट बरिष्ठ अधिकृत श्री मिलन मगरले प्रस्तुतिकरण गर्नुभएको थियो। उक्त कार्यक्रममा कुल ३२ जना पत्रकारको सहभागीता थियो।

त्यस्तै WIW2026 को अवसरमा नेपाल धितोपत्र बोर्डको आयोजना तथा सार्वजनिक सेवा प्रसारण (रेडियो नेपाल) को सहकार्यमा मिति २०८३/०६/२४ गते शनिवारको दिन विहान १० बजे रेडियो नेपालमार्फत वित्तीय शिक्षा र सचेतनासँग सम्बन्धित विषयहरूमा केन्द्रित भई करिव ४५ मिनेटको एक परिसम्वाद रेडियो कार्यक्रम सञ्चालन गरिएको थियो। उक्त रेडियो कार्यक्रममा बोर्डका अध्यक्ष डा. गोपाल प्रसाद भट्ट, बोर्डका पूर्व अध्यक्ष डा. रेवत बहादुर कार्की तथा त्रिभुवन विश्वविद्यालयका प्राध्यापक डा. राधेश्याम प्रधान सहभागी हुनुहुन्थ्यो।

त्यससका साथै WIW2026 को मुख्य नारा तथा विषयवस्तुमा केन्द्रित रही साताभरी नै नेपाल स्टक एक्सचेन्ज लि., सिडिएससी एण्ड क्लियरिङ्ग लि, मर्चेन्ट बैंकर असोसिएसन अफ नेपाल, स्टक ब्रोकर असोसिएसन अफ नेपाल, स्टक डिलर कम्पनीहरु तथा क्रेडिट रेटिङ्ग कम्पनीहरुले साधारण लगानीकर्ता तथा विद्यार्थीहरू लक्षित Podcasts, Panel Discussions, Office Visits जस्ता कार्यक्रमहरू लगायत देशभरीका विभिन्न स्थान तथा स्कुल/कलेजहरुमा पूँजी बजार साक्षरता तथा सचेतना कार्यक्रम संचालन गरी उक्त सप्ताह भव्यताका साथ मनाएका थिए।

World Investor Week 2026 को अवसरमा देशव्यापी रुपमा बोर्ड तथा बजार सहभागीहरूले संचालन गरेका उल्लेखित कार्यक्रमहरुबाट आम लगानीकर्ता तथा विद्यार्थीवर्गलाइ पूँजी बजार शिक्षा, धितोपत्र बजारको गतिविधी तथा महत्वको सम्बन्धमा जानकारी प्राप्त भई पूँजी बजार साक्षरतामा अभिवृद्वि हुने र यसबाट धितोपत्र बजारका लगानीकर्ताहरुले लगानी निर्णय गर्नुपूर्व सुसूचित र जिम्मेबार भई, निहित जोखिम बुझी, अफवाहहरूबाट टाढा रही आफ्नो व्यक्तिगत आवश्यकता अनुसार लगानी गर्ने संस्कृतिको विकास गर्ने र सोबाट समग्र पूँजी बजारको समेत विकास हुने विश्वास बोर्डले लिएको छ।

मितिः २०८३/०६/२७